Ish-kreu i LSI, Petrit Vasili ka ngritur alarmin se investitorët vendas, por edhe të huaj po largohen nga Shqipëria.
Me anë të një postimi në Facebook, Vasili shkruan se Shqipëria ka nevojë për model ekonomik dhe për një pakt kombëtar për ekonominë, që të ngjallë besim e siguri, që ta bëjë biznesin të kthejë sërish sytë nga Shqipëria.
Sipas Vasilit, banka e Shqipërisë raporton se bankat shqiptare po kreditojnë masivisht bizneset në Kosovë, Maqedoni dhe Turqi.
POSTIMI I VASILIT:
Paratë po ikin, ekonomia po rrënohet dhe shkollëpaku argaliset me call center.
Banka e Shqipërisë raporton se bankat shqiptare po kreditojnë masivisht jo bizneset në Shqipëri, por bizneset në Kosovë, Maqedoni, Turqi dhe jo pak, por plot 505 milionë euro.
Këta tregues po rriten vit pas viti. Biznesi shqiptar po përjeton ditë shumë të vështira.
Dërdëllitjet televizive të kryeministrit të paditur në kotecin e tij televiziv për call-center për biznesin janë lajthitjet e një mendjeje boshe dhe të paaftë, qe po e çon vendin drejt një humnere ekonomike, që prodhon vetëm varfëri të thellë, polarizim të frikshëm shoqëror, deprimim dhe rrënim pa kthim.
Dikush duhet t’ia shpjegojë këtij kryeministri të paditur, që qesh pa vetëdije, se paratë e drogës dhe krimi që janë ulur këmbëkryq ngado, po e shkretojnë ekonominë e Shqipërisë dhe po i bëjnë edhe investitorët vendas, e jo më ata të huaj, që të ikin nga sytë këmbët.
Shqipëria ka nevojë klithëse për model ekonomik dhe për një pakt kombëtar për ekonominë, që të ngjallë besim e siguri, që ta bëjë biznesin të kthejë sërish sytë nga Shqipëria. Këtë mund ta bëjnë vetëm profesionistët dhe jo shkollëpaku.
