Kosova ka regjistruar dy rastet e para me variantin indian të koronavirusit, Delta. Lajmi është konfirmuar nga Ministria e Shëndetësisë në këtë vend. Të infektuarit janë në gjendje të mirë shëndetësore dhe momentalisht po gjurmohen kontaktet e tyre.
Sipas njoftimit, masat parandaluese janë të njëjta, dhe individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet
Konfirmimi i tyre, u bë pasi Kosova dërgoi 22 monstra pozitive në Institutin e Virologjisë të Klinikës Unversitare Charite në Berlin.
Njoftimi i Ministrisë së Shëndetësisë në Kosovë
”Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 (dy) mostra me variantin Delta (B.1.617.2) të SARS-CoV-2. Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e Institut Kombëtar të Shëndetit Publik, tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve.
Masat parandaluese janë të njëjta. Individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës.”
