Urdhri i Stomatologut parashikon rritjen e çmimeve për shërbimet stomatologjike, vendim i marrë në mbledhjen e Asamblesë Kombëtare.
Ai ka vendosur çmimet dysheme për 13 shërbimet kryesore që ofrojnë dentistët, ku parashikohet rritje e çmimeve.
Kështu, nëse para një viti mbushja e një dhëmballe ka qenë në çmimin e 2000-2500 lekëve të rinj, tashme çmimet e reja do të shkojnë minimalisht nga 4000 deri në 5000 mijë lekë të rinj.
Pastrimi i gurëzave do të ketë çmim dysheme, jo më pak se 3000 lekë të rinj.
Ndërkohë që protezat pësojnë një rritje të ndjeshme. Stomatologët do të jenë të ndaluar që të kryejnë proteza të thjeshta nën 40 mijë lekë të reja.
Ndërkohë që vendosja e impianteve do të shkojë deri në 70 mijë leke të rinj.
Rritje të ndjeshme pëson dhe vendosja e dhëmbëve më këllëf, ndërkohë që vendosja e aparateve dentar fiks do të shkojë deri në 100 mijë lekë të reja.
Kjo listë e çmimeve i është përcjellë Ministrisë së Financave, e cila me kërkesë të Urdhrit të Stomatologut do të bëj të mundur ndërhyrjen në kasat fiskale dhe për të vendosur çmimet dysheme për shërbimet që do të kryejnë qytetaret, raporton Panorama.
Ndërkohë që në këtë vendim është theksohet se për shërbimet e tjera, stomatologët janë të lirë të vendosin çmimet që dëshirojnë.
Me këtë vendim Urdhri i Stomatologut i dikton tregut çmimet dhe në këtë mënyrë dëmton konkurrencën e lirë, pasi tashmë klinikat dentare mund të ofrojnë çmimet më të larta se ato të vendosura nga USSH, por jo më të lira.
Nuk dihet nëse për këtë Autoriteti i Konkurrencës ka nisur një hetim apo do të dalë me një vendim të posaçëm për ta ndaluar këtë vendimmarrje që dëmton interesat e qytetarëve.
