Qyteti i Hjuston në SHBA po përballet me një situatë katastrofike për shkak të uraganit Harvey.
Të paktën 33 persona kanë vdekur, ndërsa qindra mijëra familjeve u janë përmbytur shtëpitë, duke humbur gjithçka kishin, mes tyre 20 familje shqiptare.
Mentor Fejzullahu është shqiptari që ka shkuar në SHBA pas luftës në Kosovë. Ai u ka ardhur në ndihmë të prekurve nga uragani Harvey.
Vlora Çitaku, ambasadorja e Kosovës në SHBA ka publikuar rastin e Fejzullahut në Facebook, ndërsa shkruan se është shumë krenare për të.
Një tjetër shqiptar 14-vjeçar ka ardhur në ndihmë të njerëzve në Hjuston bashkë me familjen e tij, ndërsa rastin e bën publik sërish ambasadorja Çitaku.
POSTIMI I ÇITAKUT PËR DINAJN:
“Njihuni me Arti Dinaj. Ai është 14 vjeç. Ai ka lindur në SHBA, por prindërit e tij erdhën në Amerikë gjatë luftës së Kosovës ne 1999.
‘Si të mos i ndihmoj njerëzit në nevojë në Hjuston’, thotë Arti, ‘ata i ndihmuan prindërit e mi dhe njerëzit tanë kur kishim nevojë’”.
POSTIMI I ÇITAKUT PËR FEJZULLAHUN:
“Njihuni me Mentor Fejzullahun. Mentori erdhi në Amerikë pas luftës së Kosovës dhe tani jeton në Houston, Texas. Houstoni po përballet me një sfidë të madhe për shkak të uraganit Harvey. Si gjithmonë, katastrofat e këtyre madhësive arrijnë të shfaqin më të mirën që ka për të ofruar njerëzimi, guximin dhe solidaritetin. Kujdesuni për njëri-tjetrin.
Mentori këto ditë ka qenë vullnetar për të shpëtuar njerëzit. Kur sot kam folur me të gjatë ditës nuk më tha asnjë gjë, por njerëzit e tjerë nga Houstoni më treguan. Nuk mund të isha më shumë se kaq krenare për Mentorin”.
