Ndërkohë që aplikimet e studentëve që duan të ndjekin shkollat e larta nisin të enjten, rektori i Universitetit të Mjekësisë thotë se kanë bërë diferencim të vlerësimit me pikët e lëndëve që ka prioritet mjekësia.
“Kriteret janë si kriteret e vjetshme, me përjashtim që për të bërë një korrigjim të lehtë të atyre problemeve që patëm, kemi vënë një koeficient të këtyre lëndëve me zgjedhje të maturës shtetërore. Nëse vjet si kimi e thelluar, si kimi bërthame si një lëndë tjetër e kishte koefiçinetin një, këtë vit e kemi për lëndën e thelluar 1.25 për qind koefiçenti, 1.15 nëse është bërthamë dhe çdo lënde tjetër kërkesë e universitetit tonë i kemi vënë koefiçinetin 1”, thotë Arben Gjata, rektor i UMT.
Vitin e kaluar në Universitetin e Mjekësisë kanë aplikuar vetëm 9000 maturantë, ndërkohë që këtë vit do të pranohen rreth 1100 studentë. Kuotat e pranimit janë të njëjta me kuotat e vitit të kaluar. Megjithatë si kriter aplikimi është mesatarja mbi 8.5. Thuhet se pas disa vitesh do të riaktivizohet edhe programi Bachelor shëndet publik.
“Në total në mos gaboj janë rreth 60-70 kuota që janë hapur për spitalet e trojeve, dhe sivjet do riaktivizojmë programin e shëndetit publik që vjet për shkak të mbingopjes së tregut kishim 2-3 vjet që e kishim mbyllur bachelorin, sivjet do hapet dhe bachelor në shëndetin publik ”, tha Gjata.
Por mes Universitetit të Mjekësisë dhe Universitetit të Prishtinës është nënshkruar një marrëveshje bashkëpunimi, në themel të së cilës është shkëmbimi i eksperiencave të ndërmjetme, stafit akademik dhe studentëve.
