Nga Libofsha e Fierit, kreu i Kuvendit Gramoz Ruçi komentoi protestën e një ditë më parë para të banorëve të Unazës së Re.
Ashtu si kryeministri, edhe kryeparlamentari Ruçi, ndau të njëjtin qëndrim, se banesat nuk mund të legalizohen aty ku nuk e lejon ligji.
‘Apeli im do të ishte, që kjo marri 28 vjeçare duhet të marr fund. Asgjë nuk zgjidhet në rrugë jashtë institucioneve dhe jashtë ligjit. Zgjidhet në bashkëpunim me institucionet dhe siç është thënë do shihen një për një të gjitha objektet si ato që janë legalizuar edhe të tjerat. Të legalizuarit do marrin dëmshpërblime VKM dhe më pas do nisë prishja, të tjerët sipas hapësirave që lejon ligji, do trajtohen me bonus qiraje apo banesa sociale’ tha Ruci, ndërsa apeloi banorët të mos shpërdorojnë hallin e tyre në hallin që ka politika.
‘Të mos përdoren si mish për top. Një vajzë dje humbi gishtat. Pse? Se i interesonte politikës. Ndaj u bëj thirrje të ulemi, të diskutojmë, të njohim ligjin. Aty janë interesat e qytetarëve. Nëse dikush gjykon se zgjidhja s’është e drejtë, ka gjykata. Kështu funksionon shteti. E kam ndjerë nga afër këtë çështje, kërkon urtësi, qetësi dhe maturi për ta zgjidhur problemin”, u shpreh Ruçi.
