Heqja e taksës 100% ndaj mallrave serbë është një nga kërkesat e SHBA-së që Veseli dhe Haradinaj do e diskutojnë ditën e sotme gjatë një takimi me ambasadorin amerikan në Prishtinë, Philip Kosnett.
Takimi është thirrur nga kryetari i Kuvendit Veseli, ndërsa taksa është kritikuar disi edhe nga presidenti Thaçi, i cili ka thënë se po dëmton interesin shtetëror dhe strategjik.
“Kjo situatë është për keqardhje. Prandaj, tani është momenti t’i respektojmë këshillat miqësore amerikane, të cilat synojnë fuqizimin e shtetit të Kosovës dhe pacifikimin e rajonit. Tekat personale të asnjë lideri shtetëror nuk guxojnë të lëndojnë interesin tonë shtetëror dhe atë strategjik të SHBA-së për Kosovën e më gjerë. Veprimet populiste nuk guxojnë të cenojnë vizionin dhe vendimet strategjike të Kosovës. Cenimi i raporteve me SHBA-në, i kësaj aleance të shenjtë, paraqet fillimin e cenimit të shtetit tonë”, ka thënë ai.
Nga ana tjetër, kreu i grupit parlamentar të Lëvizjes Vetëvendosje, Glauk Konjufca ka deklaruar për KosovaPress se do të ishte naivitet i papranueshëm nëse shpjegohet se raportet mes Shteteve të Bashkuara të Amerikës me Kosovën varen nga heqja e taksës.
