Presidenti i UEFA-s, Aleksander Ceferin, mbërriti dje në Tiranë, pas situatave të kohëve të fundit. Politika “futi duart” në garën për kreun e FSHF-së (2 mars), diçka kundër parimeve dhe pavarësisë së UEFA-s. Pas ardhjes së Ceferin, është marrë garancia nga kryeministri Rama se politika do të tërhiqet, ndërsa për zgjedhjet e ardhshme UEFA ka angazhuar dy zyrtarë të lartë për të monituar situatën orë pas ore në çdo qytet të Shqipërisë, për të mos patur probleme si ato aktualet. Ardhja e Ceferin ka marrë vëmendjen edhe të mediave të huaja.
Intervistë në AP: UEFA kërkon politikën jashtë futbollit shqiptar
“Presidenti i UEFA-s, Aleksander Ceferin tha se shqetësimet e tij për ndërhyrjet politike në zgjedhjet e futbollit shqiptar u zbutën pas takimit me kryeministrin e vendit, të enjten. Ceferin u angazhua gjithashtu për organizimin e finales inauguruese të Ligës së Konferencës së Evropës në Tiranë, pas një takimi me kryeministrin Edi Rama dhe zyrtarë të Federatës Shqiptare të Futbollit, (FSHF).
Një shpërthim tronditi shtëpinë e presidentit të federatës Armand Duka në janar, pa shkaktuar lëndime. Duka është në rizgjedhje muajin e ardhshëm për një mandat të gjashtë katërvjeçar, por tha se ka marrë gjithashtu mesazhe me tekst kërcënues për jetën, ku i kërkonin të jepte dorëheqjen. Zgjedhjet kanë shkaktuar edhe një përplasje mes Dukës dhe bashkisë së Tiranës, e cila e ka akuzuar Dukën për korrupsion.
UEFA kishte paralajmëruar për “ndërhyrje politike në drejtimin e federatës shqiptare” dhe kishte vënë në pikëpyetje nëse do të ishte e sigurt të organizohej finalja e Konferencës së Evropës në Shqipëri. Por Ceferin tha se ishte i kënaqur me garancitë që mori nga Rama për të dyja pikat.
“Unë rashë dakord me kryeministrin se nuk do të ketë ndërhyrje qeveritare, se futbolli do të vendosë për futbollin dhe kjo është ajo që ne duam”, tha Ceferin për Associated Press. “Ne duam zgjedhje të ndershme. Ne nuk duam asnjë ndërhyrje nga asnjëra anë”.
Megjithatë, ai shtoi se organi qeverisës evropian do të dërgojë ende vëzhgues për t’u siguruar që zgjedhjet të mbahen pa u ndikuar nga të huajt.
“Gjithçka duhet të jetë transparente dhe me qeverisje të mirë”, tha ai. Finalja e Europa Conference League, një kompeticion i nivelit të tretë që debutoi këtë sezon, do të mbahet më 25 maj në Tiranë, siç ishte planifikuar, tha Ceferin.
“Finalja këtu është e sigurt dhe ne po presim me padurim sepse është finalja e parë e Ligës së Konferencës së Evropës në histori”, tha ai.
Rama pati gjithashtu një ton optimist pas bisedimeve. “Takimi i sotëm me presidentin e UEFA-s nuk mund të ishte më i mirë për qëllimin tonë të përbashkët, për mbajtjen në Tiranë të finales së parë europiane, si dhe mbajtjen e një procesi të besueshëm për të gjitha palët e përfshira në zgjedhjet e reja të FSHF-së”, shkruan Rama.
Ceferin përsëriti gjithashtu kundërshtimin e tij ndaj planeve të FIFA-s për një Kupë Botërore dy-vjeçare, duke thënë se propozimi është “i pakuptimtë”.
Presidenti i FIFA-s, Gianni Infantino ka këmbëngulur se organizimi i Kupës së Botës çdo dy vjet në vend të çdo katër vjet, do të lejojë më shumë vende të kualifikohen dhe të krijojnë më shumë interes dhe të ardhura.
“Ideja është kundër futbollit, kundër futbollit të meshkujve dhe femrave. Është kundër sporteve olimpike”, tha Ceferin. “Kështu që unë nuk mendoj se mund të ndodhë ndonjëherë”. Planet e FIFA-s janë kundërshtuar gjithashtu nga konfederata e futbollit të Amerikës së Jugut, e cila ka thënë se nuk ka “asnjë shans” që një propozim i tillë të kalojë”.
Burimi i lajmit: AP News. Përshtatur nga Tirana Today
