Presidenti i Kosovës, Hashim Thaçi ka dekoruar sot ish-kryeministrin e Kosovës, Bajram Kosumin, i cili kishte kaluar pushime të dyshimta në Turqi ku më pas ishte kthyer me aeroplan privat, ndërsa dyshohej se ai udhëtim i kishte kushtuar rreth 20 mijë euro.
Thaçi përmes një shkrimi në llogarinë e tij në Facebook ka thënë se ka dekoruar sot me medaljen e dhjetëvjetorit të Pavarësisë ish-kryeministrin, Kosumi. Ka thënë se ka dekoruar Kosumin për veprimtarinë e tij të shquar të demonstratave të vitit 1981-shkruan Insajderi.
“Me Medaljen Presidenciale Jubilare të dhjetëvjetorit të pavarësisë e dekorova ish kryeministrin e Kosovës, veprimtarin e shquar të demonstratave të viti 1981, rektorin e Universitetit ‘Kadri Zeka’ të Gjilanit, Bajram Kosumi”.
“Bajram Kosumi ka dhënë kontribut të jashtëzakonshëm në Konferencën e Rambujesë si dhe në demokratizimin e skenës politike të Kosovës”-ka shkruar Thaçi.
Kosumi ishte akuzuar për mitmarrje dhe korrupsion për shkak se kishte përdorur siç kishte pretenduar ai aeroplanin privat të mikut të tij, Ethem Çekut, i cili në atë kohë mbante postin e ministrit. Shkak për udhëtimin emergjent të tij dhe për ndërprerjen e pushimeve kishte qenë vizita e pa paralajmëruar e ambasadorit, Kai Eide.