Aeroporti i Prishtinës, “Adem Jashari” gjatë mëngjesit së sotëm ka qenë i bllokuar për një orë. Gjatë 60 minutave në këtë aeroport nuk ka pasur as nisje e as ulje aeroplanesh.
Shoqata Sindikale e Kontrollorëve të Trafikut Ajror, kanë mbajtur grevë një orëshe për shkak të pakënaqësive të përfshirjes së këtij institucioni në ligjin për pagat.
Për nesër kjo sindikatë ka paralajmëruar se do të mbajë grevë 4 orëshe, për të vazhduar pastaj për ditën e premte nga ora 8:00 deri në ora 16:00, ditën e shtune nga ora 8:00 deri në ora 20:00.
Greva do të pezullohet të dielën për shkak të pavarësisë së Kosovës për të vazhduar të hënën me grevë 24 orëshe.
Artan Hasani, kryetari i sindikatës ka thënë se greva e tyre do të sjellë probleme të mëdha në trafikun ajror.
“Me miratimin e ligjit për paga neve si Agjenci na cenohet autonomia e institucioneve dhe ne jemi shprehur kundër këtij ligji”, tha ai.
Hasani bëri të ditur se gjatë kohës së grevës, shërbime do të ofrohen vetëm për fluturimet ushtarake, ambulantore, shtetërore dhe atyre emergjente.
Të revoltuar me këtë projektligji janë sindikatat e Agjencisë së Shërbimeve të Navigacionit Ajror, ajo e Kontrollorëve të Trafikut Ajror dhe e Punëtorëve të Kontrollit Ajror.
Në fillimi të këtij muaji Kuvendi i Kosovës ka miratuar Projektligjin për Pagat në sektorin publik.
Ndryshe, Projektligji për Paga ishte temë debatesh të nxehta dhe grevash të shumta gjatë javëve të fundit.
Në shenjë pakënaqësie me këtë Projektligj, për tri javë rresht kanë qenë në grevë punëtorët e arsimit në të gjitha nivelet e arsimit publik në Kosovë. Në grevë hynë edhe punëtorët shëndetësor, ata të administratës dhe të institucioneve të tjera publike./Fatos Shala për Monitor.al/.
