Gjykata ka ndryshuar gjatë ditës së sotme masën për dy prej autorëve të vrasjes së 17-vjeçarit, Marvi Mihali, rreth një vit më parë, për një karikues telefoni. Gjykata Penale e Tiranës ndryshoi sot masat e sigurisë për Kridens e Marsel Allën. Nga “detyrim me paraqitje” ndaj tyre, është marrë masa e sigurisë “arrest me burg” .
Sakaq, për Eugen Bitrajn, Prokuroria nuk ka kërkuar ndryshim akuze, dhe do të vazhdojë të hetohet në gjendje të lirë për “moskallëzim krimi”.
Prokuroria e Krimeve të Rënda ka nisur hetimin për gjyqtarët dhe prokurorin që liruan tre personat e akuzuar për bashkëpunim në vrasjen e Marvi Mihalit për një karikues celulari një vit më parë.
Ngjarja
Marvi Mihali u vra më 31 korrik të vitit 2017, në zonën e stadiumit “Dinamo”. Muajin e kaluar, emisioni “Të Paekspozuarit” në “Top Channel”, publikoi një video ekskluzive, ku tregon vrasjen barbare të Marvi Mihalit, 22-vjeçarit, në datë 31 korrik 2017. Marvi është djali i ish-sportistit të njohur Pavllo Mihali, dhe mësueses së anglishtes, Mira Mihali, të cilët po përjetojnë dramën më të madhe të djalit të tyre.
Pamjet ekskluzive të siguruara nga “Të Paekspozuarit”, para dhe gjatë momentit të sherrit, tregojnë për një plan mirë të organizuar nga grupi kriminal i të rinjve. Dejvi Bitraj, Eugen Bitraj, Marsel Alla, Kridens Alla dhe shumë të tjetë kishin rrethuar zonën, për ti bërë pritë bashkëmoshatarëve të tyre, Armend Haxhiut, Xhoslin Shatës, Marvi Mihalit.
Një nga organizatorët e krimit i bën me shenjë grupit të sulmit, se po vjen Armendi, Marvi dhe Xhoslini. Në atë moment, del në skenë Dejvi Bitraj, i cili shkëmben fjalë me Armendin, por ky i fundit, nuk duron dhe e godet me grusht. Në atë moment, grupi i agresorëve, rrethojnë Marvin, Armendin dhe Xhoslinin.
Edhe pse “stërmullari” i sherrit ishte Armend Haxhiu, autorët e krimit iu vërsulën brutalisht 22 vjeçarit Marvi Mihalit. Sipas videos, shihet qartë që Marvi as nuk ka sulmuar njeri, as nuk ka goditur njeri, por është qëlluar në mënyrë kriminale nga bashkëmoshatarët e tij.
E gjithë skena e krimit, ndodhi vetëm 40-50 sekonda, dhe autorët largohen qetësisht nga vendngjarja.
