Ka ardhur edhe reagimi i banorëve të Astirit, pas gjestit të bërë nga Bernd Boschardt mbrëmjen e djeshme ndaj tyre, duke i treguar gishtin e mesit.
Pasditen e sotme ata kanë nisur mbledhjen e firmave për peticionin e tyre, për të shpallur “non grata” ambasadorin e OSBE-së, Bernd Boschardt.
“I them Borchardt që ne jemi qytetarë dhe kemi dinjitet, nëse është mësuar le të shkojë dhe t’i bëjë ato veprime në vendin e tij, ne do të bëjmë një peticion që të shpallet non-grata.
Gjithashtu edhe ne ashtu e përshëndesim, por nuk i ka hije, sepse ai është këtu për të vënë balancën në vend. Ai është këtu për të qenë i paanshëm. Çfarë i shqetësoi atij shprehja “Rama ik”, ai tregoi se është i anshëm se me atë i ka bërë pazaret. Ai nuk ishte një gjest në inat e sipër, është në vazhdim të veprimeve të tij, në mbështetje për 30 qershorin, zgjedhje që u hodhën poshtë. Kanë dërguar njerëzit më të ulët këtu”, u shprehën banorët për mediat.
Banorët e Astirit prej muajsh protestojnë për marrjen e dëmshpërblimit për shembjen e banesave të tyre, të cilat preken nga projekti i Unazës së Re.
