Gjykata ka dhënë masën e sigurisë për Hekuran Hoxhën, i cili u arrestua ditë më parë në vijim të operacionit “Vol-Vo 4”. Gjykata caktoi masën “arrest me burg”, ndërsa avokati i tij Armand Tragaj tha se ndaj klientit të tij nuk ka prova.
Avokati shtoi më tej se masa iu komunikua kur ishte në QSUT, ku po mjekohet për shkak të problemeve me shëndetin, dhe ndodhet në repartin e kardiologjisë.
Tre ditë më parë, në kuadër të operacionit të bujshëm “Vol-Vo 4″, u vu në pranga 46 vjeçari Hekuran Hoxha. Arrestimi Hoxhës u bë pasi Prokuroria pranë Gjykatës së Shkallës së Parë për Krime të Rënda ka lëshuar në datën 17 janar 2019, urdhër ndalimi për të.
48 vjeçari dyshohet për kryerjen e veprave penale “Prodhim dhe shitje e narkotikëve”, “Trafikim i narkotikëve”, “Prodhim dhe fabrikimi i lëndëve narkotike dhe psikotrope, në bashkëpunim në formën e posaçme të grupit të strukturuar kriminal”, “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale”.
