Lazio barazoi 1-1 me Atalantën dhe kjo e gjitha falë portierit të kombëtares shqiptare, Thomas Strakosha. Numri 1 i lacialëve ka qenë fantastik në këtë ndeshje ku ka bërë disa pritje decizive. Skuadra e drejtuar nga Inzaghi ishte në vështirësi gjatë gjithë ndeshjes, kishte dhe lodhje fizike tek lojtarët dhe kjo bëri që Strakosha të kthehej si një tabelë qitjeje për miqtë.
Një pikë që vlen shumë për Lazion në garën për në Champions League dhe kjo e gjitha falë Strakoshës, që pas ndeshjes ka marrë vlerësime maksimale duke e shpallur si lojtarin më të mirë të takimit.
Ky vlerësim ka ardhur nga faqja pranë klubit lacial, “Laziopress”, duke e vlerësuar Strakoshën me notën 7.5. “Nuk është vetëm goli i dy minutave të para që pësoi Strakosha nga Barrow. Ai arriti të ndalojë Ilicic në një zonë të vogël dhe të shpëtojë portën nga gjuajtjet e Freuler dhe Gomez. Pikë e marrë falë pritjeve të tij”, përfundon vlerësimi për shqiptarin.
Ndërsa Strakosha për “Premium Sport”, është shprehur se ka bërë vetëm detyrën e tij ndaj Atalantës. “Periudha negative e rezultateve? Ne kemi provuar se jemi një ekip i fortë pavarësisht momenteve të vështira. Unë bëra atë që duhet të bëja, për të mbrojtur rezultatin që kishin arritur shokët e mi. Nuk mund t’i fitojmë të gjitha ndeshjet, ka ndikuar edhe lodhja, por tashmë jemi të fokusuar për takimin ndaj Krotones”, është shprehur Strakosha.
