Kreu i Partisë Demokratike, Lulzim Basha ka dhënë arsyen e ngjarjes së rëndë në ish-Bllok. Në një bashkëbisedim për gazetarët, Basha tha se sherri ka ndodhur për pazare droge dhe pastrim parash. Një faktor tjetër, sipas Bashës, është mbështetja dhe toleranca e forcave të rendit ndaj bandave kriminale. Madje, Basha tha se Ervin Mata ka qenë në Gjermani me Saimir Saimir Tahirin pasi ministrit iu kthye pasaporta.
Basha tha se policët “luftojnë” shitësit ambulante, por tolerojnë bandat kriminale.
Fjala e Bashës:
Janë tre banda që kontrollojnë gjithçka në Elbasan. Në Shkodër ligjin e bëjnë Bajrat dhe bandat e tjera. Lidhje të drejtpërdrejt me ministrin e Jashtëm, për çështje zgjedhore, politike, por edhe të kryetarit të ri të Federatës Shqiptare. Në Vlorë gjithçka sundohet nga bandat. Kishim Habilajt, sot 100% të detit e kontrollojnë njerëzit e klanit kriminal Xhafaj. Gjendja në Fushë Krujë dhe Krujë, është maja e ajsbergut. Sundohen nga krimi, zona të pakontrollueshme nga policia. Ngjarja e fundit në Tiranë, që u shit si përplasje për një këngëtare, ishte përplasje mes bandave kriminale, në lokalin e preferuar të Arben Ahmetajt. E mbani mend, kur Tahiri u nis për Gjermani pasi iu kthye pasaporta? Ishte në Gjermani me këtë Matën e përfshirë në sherrin me armë në lokal mes bandave rivale. Ka ndodhur në një lokal të preferuar të Ahmetaj dhe të ministrave dhe deputetëve të tjerë, në zemër të Tiranës.
Në këto 4 vite, në ato 1 km katror kanë ndodhur vrasjet më mafioze. Kjo tregon se nuk jemi të sigurt më në asnjë vend në Shqipëri. Kriminelët dhe vrasësit më të rrezikshëm janë të lirë dhe këtu sillen si biznesmene, si sipërmarrës, si pronarë lokalesh madje dhe si deputetë në rastin e Rrahman Rrajës. Askush nuk i prek sepse dhuna është rezervuar për shitësit ambulantë, me ata merret policia. Kjo është tabloja e gjendjes në Shqipëri. Trafiku i drogës dhe pastrimi i parave janë kthyer në aktivitetin kryesor ekonomik të Shqipërisë.
Kemi shkatërrim total të organeve të zbatimit të ligjit. Kjo qeveri nuk ka vullnet për të luftuar krimin. Krimi tolerohet dhe mbështetet nga Edi Rama.
Të gjitha janë përplasje për trafiqe droge dhe pastrim parash, asnjë nuk është ngjarje banale.
