Ministria e Finacave konkretizon paralajmërimet për penalizim ndaj të gjithë punonjësve të Adiminstratës Publike në varësi të saj, që do të përfshihen në fushatën zgjedhore.
Pas vendimit të djeshëm për pezullim të dhënies së lejeve vjetore nëpunësve deri në fund të muajit qershor, me qëllim mospërfshirjen në aktivitete partiake, vjen sot kallëzimi i parë penal me këtë motiv.
Kliton Bistri, oficer i Policisë Gjyqësore, i shkarkuar një ditë më parë nga detyra, është kallëzuar sot penalisht nga Ministria e Financave,”për pjesëmarrje ne fushatë, në kundërshtim me ligjin dhe urdhrin nr.65/2017 të Kryeministrit”.
Nisur nga ky rast, Ministria e Financave kërkon nga të gjithë punonjësit e institucioneve të varësisë qe të zbatojnë me përpikmëri detyrat funksionale në përputhje me legjislacionin në fuqi.
Ministria u bën thirrje qytetarëve të denoncojnë rastet e evidentuara të përfshirjes së punonjësve të administratës në varësi të saj, në aktivitete partiake. “Ata janë të lutur që të na shkruajnë ose të na dërgojnë foto apo filmime në numrin 0676054545. (Whatsapp, Viber)” bën thirrje Ministria e Financave.
