Enisa Doda u gjet e mbytur ditën e djeshme në plazhin e Velipojës. Vajza nga Burreli kishte shkuar për pushime me familjen, por nuk mundi të dilte e gjallë nga deti.
Ajo bashkë me 25-vjeçarin, Indrit Bajraktari, ishin futur në det me motor uji. I riu doli në breg 2 orë e gjysmë më vonë, por nuk kishte me vete as motorin e ujit dhe as vajzën.
Ai u tha pronarëve të motorit të ujit, se e kishte nxjerrë vajzën në breg dhe e kishte marrë xhaxhai i saj.
Familja Doda ka hapur dyert e mortit në banesën e tyre në Bathore të Kamzës, pasi janë kthyer nga pushimet në Velipojë, pa vajzën.
I ati i vajzës ka thënë për ”News24” se 25-vjeçari Indrit Bajraktari ishte i njohur për familjen e tyre.
Sot ka dalë përgjigjja e ekspertizës mjeko-ligjore, e cila ka treguar se vajza ka humbur jetën pasi është mbytur, ndërsa të nxirat që kishte në trup janë shkaktuar nga përplasja në ujë, pasi ka rënë nga mjeti. Mësohet se vajza gjatë xhiros me motor uji, nuk e kishte jelekun dhe nuk dinte të notonte.
