Arbër Çekaj, i cili akuzohet se ka porositur 613 kg kokainë, ka depozituar një padi në Prokurorinë e Posaçme Antikorrupsion, prokurorin e çështjes, Ervin Kondili si dhe oficeren e policisë gjyqësore, Migena Haxhia.
Çekaj është pronari i firmës “Arbi Garden”, që porositi ngarkesën me banane ku u gjetën rreth 613 kg kokainë. Sasia e drogës, më e madhja ndonjëherë e sekuestruar në vend, u kap në mars të vitit 2018.
Sipas avokatit të tij ligjor, Çekaj pretendon se ka një akt të falsifikuar në lidhje me hyrje-daljet e tij në sistemin TIMS.
“Më datë 28. 02. 2018 është bërë këqyrja e të dhënave të sistemit TIMS për Çekaj dhe ka rezultuar se dalja e fundit e regjistruar është 12. 03. 2015 nëpërmjet pikës së kalimit kufitar Rinas dhe hyrja e fundit më datë 11. 02. 2018 në Muriqan”, shkruhet në konkluzionet e paraqitura nga ana e prokurorit Kondili.
Mirëpo, dokumentet e tjera shkresore të marra nga OPGJ në Durrës, provojnë se Çekaj ka 50 dalje jashtë vendit dhe jo siç ka pretenduar prokurori në konkluzionet e tij. Në këtë kallëzim janë përfshirë dhe transkriptime të bisedave telefonike mes të pandehurit Çekaj dhe një oficeri policie.
“Në këtë bisedë e cila ka zgjatur dy minuta e gjashtë sekonda është komunikuar nga ana e oficerit të Anti Narkotikut i cili është prezantuar Arbër Çekajt për funksionin e tij dhe e ka pyetur ku ndodhej.”
Mësohet se organi i akuzës ka kërkuar 21 vite burg për Çekajn. Për shkak të gjykimit të shkurtuar, ai do të bëjë 14 vite burg. Ndërkohë, Çekaj mohon se ka patur dijeni për sasinë e lëndës narkotike, ndërsa pretendon se kontejnerët ku u gjet droga nuk janë në pronësinë e tij.
