Një 21-vjeçar shqiptar, i cili po tentonte të shiste kokainë, u arrestua në Britaninë e Madhe. Bëhet fjalë për Rexhino Toska, i cili është dënuar me 30 muaj burg, pasi u kap me kokainë me vlerë 850 paund.
Sipas mediave vendase, i riu shqiptar kishte hyrë në territorin britanik ilegalisht me kamion, në dhjetor të 2018-ës, ndërsa në Swavesey, Cambridgeshire, përdorte një patentë me identitet italian, “Maurizio Conti”.
Toska qarkullonte me një autmojet tip ‘Benz’ luksoz dhe dokumente të falsifikuara. Autoritetet gjetën brenda në veturë 17 doza kokainë, si dhe 450 paund. Në momentin e arrestimit, Toska u tha oficerëve në paraburgim: “Unë e shes kokainë sepse anglezët e duan drogën.”
Ndërsa, para gjykatës, shqiptari deklaroi se kokainën e shiste për të shlyer borxhin prej 8 mijë paundësh që kishte paguar për të hyrë në Britaninë e Madhe.
Prokurorja Sara Walker i tha gjykatës se kur u ndalua nga policia, 21-vjeçari u tha se fliste italisht, por, sipas saj, kur i vendosën një përkthyes italian që të fliste me të, u bë e qartë që ai nuk fliste italisht.
