Manovrat e gabuara në breg të detit me skaf, i kanë marrë jetën në mënyrë tragjike një fëmije 5-vjeçar. I mituri i cili ka qenë u larë në det është përplasur fillimisht nga pjesa ballore e skafit dhe ka ndërruar jetë në vend. Ngjarja ka ndodhur rreth orës 14:00 në plazhin e Potamit, një plazh i mbi populluar. Shtetasi me inicialet A. T., është shoqëruar në Komisariatin e Policisë Himarë, dhe po kryhen procedurat për arrestimin e tij. Grupi hetimor ndodhet në vendngjarje, dhe po punon për sqarimin e plotë të rrethanave të ngjarjes.
“Sot, rreth orës 14:00, në plazhin e Potamit, shtetasi A. T., duke drejtuar një mjet lundrues tip skaf, dyshohet se ka humbur kontrollin mbi drejtimin e mjetit lundrues dhe për pasojë mjeti lundrues ka goditur një fëmijë rreth 5 vjeç, i cili për shkak të dëmtimeve ka ndërruar jetë në vendngjarje. Drejtuesi i mjetit lundrues është shoqëruar në Komisariatin e Policisë Himarë dhe po kryhen procedurat për arrestimin e tij. Grupi hetimor ndodhet në vendngjarje dhe po punon për sqarimin e plotë të rrethanave të ngjarjes”, njofton policia.
