Detaje të reja kanë dalë në dritë nga vrasja e Eri Zefit në 2 tetor në fshatin Zallë Xhuxhë, në Fan të Mirditës. Policia ka identifikuar dhe ka shpallur në kërkim Mikel (Gjovalin) Alia, si një nga autorët e dyshuar të ekzekutimit të 34-vjeçarit. Dyshohet se vrasja ka ndodhur për gjakmarrje.
Eri Zefi është vëllai i Ndue Zefit. Ky i fundit në shkurt të këtij viti ka vrarë fqinjin e tij 45-vjeçarin Martin Ndreca, pas një sherri banal.
34-vjeçari Eri Zefi u ekzekutua me 6 plumba, 4 prej të cilëve e kanë kapur në kokë ndërsa 2 të tjerët në gjoks. Në trupin e viktimës nuk janë konstatuar shenja dhune. Vrasja rezulton të ketë ndodhur gjatë natës, pikërisht në vendin ku është gjetur trupi i viktimës.
Viktima u gjet i vrarë rreth orës 16:00, në një zonë të pyllëzuar, 50 metra larg Rrugës së Kombit. Ka qenë një banor i zonës, i cili ka pikasur trupin e viktimës në një kanal dhe menjëherë ka njoftuar policinë në lidhje me ngjarjen.