Gjykata e Korçës ka lënë në masën “arrest me burg” për tre të akuzuarit, për vrasjen e Martin Çeços disa ditë më parë në Maliq. Bleti Angjo, Valter dhe Edlir Mollaj u shfaqën sot në gjykatë të tre kokëulur, duke mos pranuar akuzat. Për të pandehurit Bleti Angjo dhe dy kushërinjtë Valter e Edlir Mollaj rëndon akuza “vrasje me paramendim e kryer në bashkëpunim”. Dy kushërinjtë Mollaj nuk e kanë pranuar krimin, duke thënë në sallën e gjyqit se “Ne nuk kemi faj”.
Mësohet se Bleti Angjo ka thënë vetëm se “ekzekutori i 26-vjeçarit është Valter Mollaj”. Edhe Prokuroria ka pretenduar në gjyq se Valter Mollaj ka pasur marrëdhënie me vajzën, dhe sipas Akuzës, ai pretendohet si ekzekutori i të riut.
Prej datës 12 qershor, Çeço nuk ishte kthyer në shtëpi. Në datën 15 qershor babai ka bërë denoncimin për zhdukjen e të birit. Pas ekspertizës mjeko-ligjore, është konstatuar se Çeço kishte shenja në fyt.
Shkak i vrasjes dyshohet se është konflikti për të dashurën e Martinit. Para se të lidhej me Martin Çeçon, vajza ka pasur një lidhje me njërin prej vrasësve. Autorët e kanë vrarë të riun, e kanë hedhur në rezervuar dhe shapkat e tij i kishin lënë jashtë për të bërë që të dukej si vetvrasje.
