Lidhur me ngjarjen e rëndë të një ditë më parë ku u gjet pa shenja jete një 37-vjeçare, detaje të reja janë hedhur në dritë. 37-vjeçarja ishte zhdukur prej disa ditësh, dhe u gjet dje pa shenja jete në një kanal në afërsi të By Pass-it të Shkodrës. Viktima është Leze Qosa.
Burime pranë prokurorisë, policisë dhe spitalit të Shkodrës bëjnë me dije se 37-vjeçarja nuk është dhunuar para se të humbte jetën. Autopsia ka rrëzuar versionin paraprak të policisë që thoshte se viktima kishte në trup shenja dhune.
Pas autopsisë që është kryer në spitalin rajonal të Shkodrës, ka rezultuar se Leze Qosa ka disa hematoma, por që nuk konsiderohen ato që kanë shkaktuar vdekjen.
Tashmë shtohet dhe më shumë misteri për vdekjen e 37-vjeçares. Për të zbardhur atë që ka ndodhur, mësohet se janë dërguar drejt Tiranës në laborator analizat. Pistat ku po hetohet për zbardhjen e shkaqeve janë ose një vetëhelmim i 37-vjeçares, ose vdekje natyrale.
Dëshmia e motrës së viktimës
Mësohet se viktima është larguar nga banesa që më datë 8 maj, ndërsa denoncimi në polici është bërë nga e motra 10 ditë më vonë, pra më 18 maj. Që prej kësaj date, policia ka nisur kërkimet për gjetjen e gruas. Sipas motrës së Leze Qoses, e ndjera kohët e fundit vuante nga depresioni, por nuk dihet nëse pikërisht kjo ka qenë arsyeja e vdekjes së saj apo ndonjë shkak tjetër.
