Detaje të reja janë bërë publike gjatë ditës së sotme pas krimit të rëndë që tronditi Elbasanin, 58-vjeçari Koço Bozo ekzekutoi me kallashnikov bashkëshorten e tij Luljeta Bozo, në oborrin e gjykatës pasi ata ishin në një proces divorci.
Mësohet se 54-vjeçarja , fshihej në Tiranë prej shumë kohësh para se të ndodhte krimi i rëndë. Ajo jetonte në Yzberisht dhe punonte si sanitare në një lokal në këtë zonë të kryeqytetit.
Nga frika e mos e gjente bashkëshorti me të cilin kishte nisur procedurat e divorcit, Buzo u kishte kërkuar njerëzve që e njihnin që mos ta thërrisnin asnjëherë në emër.
“Mos më thërrisni në emër,”- mësohet se thoshte ajo, në mënyrë që Buzo të mos binte në gjurmët e saj.
Konfliktet mes çiftit kanë qenë të vazhdueshme për motive xhelozie. Ishte kjo edhe arsyeja qe 58-vjeçari ushtronte dhunë të vazhdueshme ndaj bashkëshortes së tij, e cila kërkonte t’i jepte fund, por burri nuk ndali derisa i mori jetën asaj.
Nga të shtënat, mbetën të plagosur edhe 2 persona të cilët ndërhynë për të neutralizuar agresorin. Njërin prej tyre e kapën plumbat në këmbë dhe tjetrin në dorë, të cilët pasi kanë marrë ndihmën mjekësore janë larguar në banesë.
