Pak orë pasi u ekzekutua poshtë banesës, mëngjesin e sotëm, fqinjët e Marjo Majollarit dhe familjarë të tij kanë vendosur tufa me lule dhe kanë ndezur qirinj në vendin ku u vra 28-vjeçari.
Të tronditur nga ngjarja dhe mes lotësh, ata thonë se Mario ishte një djalë shembull, i arsimuar, dhe i qetë.
“Djalë më të mirë nuk bënte nëna!”. Kështu është shprehur një nga fqinjët e Mario Majollarit, 28-vjeçarit të vrarë mbrëmjen e djeshme.
Ndërkohë që një tjetër ka treguar edhe një detaj nga familja e Marios, teksa shton se e ka njohur 28-vjeçarin që kur ishte 2 vjeç. Ajo ka bërë të ditur se e ëma është ndarë që atëherë nga bashkëshorti, Avni Majollari, i cili ndodhet me burgim të përjetshëm për vrasjen e dy personave.
E kam njohur që 2 vjeç, atëherë kur nëna e tij është divorcuar nga i ati. Ka qenë djalë punëtor, i mirë, që 14-vjeç ka punuar.
Fqinjët thonë se nuk ishin në dijeni të së shkuarës së babait të Marios, pasi prindërit e tij ishin divorcuar kur ai ishte vetëm 2 vjeç. Nëna e tij është kujdesur për ta rritur dhe arsimuar.
Ata thonë se Mario ka punuar që në moshë të vogël, për të përballuar shpenzimet.
Dëgjova katër krisma, mendova se mos ishin fishek zjarre. Kur vjen djali, thotë është mbushur me policë. Mendova se mos kanë vjedhur makinën e tim biri. Pastaj erdhi e motra e bërtiste Mario…”- është shprehur një nga fqinjët e 28-vjeçarit, e cila nuk i mban dot lotët.
