Një mjek i cili është baba i një djali në moshën 83-vjeçare, thotë se ai jeton çdo ditë duke e ditur se nuk do të arrijë ta shohë djalin e tij të rritet. Eksperti i të ushqyerit Alberto Cormillot thotë se ai bën gjithçka që mundet tani, për t’i dhënë fëmijës sa më shumë kujtime të jetë e mundur.
Gruaja e tij, Estefania Pasquini, 35 vjeç, mbeti shtatzënë me fëmijën pas trajtimit të fertilitetit. Pavarësisht moshës së Dr. Cormillot, ai thotë se është i përfshirë në mënyrë aktive në rritjen e djalit të tij, Emilio. Ai tha: “Unë jam i vetëdijshëm se jeta nuk është e pafund. Ai djali i vogël është këtu dhe unë do ta shoqëroj deri në një moment të caktuar”.
“Derisa të ndodhë kjo, unë planifikoj të shijoj çdo ditë në maksimum dhe të bëj plane që janë më afatshkurtra, që do të thotë se e shijoj çdo ditë sa më shumë që të mundem”.
Ai përpiqet ta bëjë sa më të këndshme kohën e tyre së bashku, për t’i lënë djalit të tij kujtime që mund t’i mbajë gjatë gjithë jetës.
Duke menduar për të ardhmen, Dr. Cormillot vazhdimisht lë mesazhe audio që djali i tij t’i zbulojë në të ardhmen. Ai tha: “Kjo do të thotë se edhe pse ai është ende me të vërtetë një fëmijë, ai ka një numër telefoni me WhatsApp në të cilin unë regjistroj audio dhe i dërgoj video. Unë nuk i mbidramatizoj gjërat, thjesht regjistroj realitetin e jetës”.
Ai tashmë ka dy djem të rritur, Renee dhe Adrian, dhe tre mbesa. Gruaja e tij e parë Monika Arborgast vdiq në vitin 2017.
Dr. Cormillot i cili jeton në Argjentinë, u diagnostikua me kancer të zorrës së trashë në vitin 2012, por të gjitha gjurmët e tumorit u hoqën me operacion.
Çifti kanë treguar se si kanë punësuar një mësues privat të gjuhës kineze për djalin e tyre, tani nëntë muajsh. Ata filluan të planifikojnë për të ardhmen e fëmijës, sapo e kuptuan se foshnja ishte rrugës.
Dr. Cormillot tha se ai donte që djali i tij të mësonte gjuhën kineze, sepse ishte “gjuha e së ardhmes”. Ai shtoi se vazhdimisht mendonte se si mund ta përgatiste më së miri djalin e tij për të ardhmen, ndërsa ai ishte ende pranë.
“Unë po e inkurajoj atë të zvarritet për shembull”. Ai tha se i pëlqente t’i mësonte djalit këngë që kur ishte fëmijë, si gjithmonë duke planifikuar se si ta shfrytëzonte sa më shumë kohën së bashku. Duke folur për mësuesin kinez të djalit, ai tha: “Emilio ka një person që dy herë në javë flet me të, i këndon dhe luan për të në gjuhën kineze. Meqë është gjuha e së ardhmes, dua që ai të mësohet ta dëgjojë që në fëmijëri dhe do ta ketë më të lehtë ta mësojë më mirë kur të rritet”.
Burimi i lajmit: New York Post. Përshtatur nga Tirana Today
