Disa javë pasi mjeti i “gangsteres” së Bilishtit Deizi Arapi u shkrumbua nga flakët, një tjetër mjet është djegur gjatë natës.
Duket se djegia e makinës së Marsel Buçit në Bilisht rreth orës 02:30 lidhet me çështje hakmarrje.
Marsel Buçi rezulton të jetë shtetasi i akuzuar nga Deizi Arapi, të cilës iu dogj mjeti pak javë më parë. Zjarrvënia sipas policisë dyshohet e qëllimshme.
Pronarit të mjetit tip “Volkswagen”, Marsel Buçit i është djegur makina rreth orës 02:30 teksa ka qenë i parkuar pranë banesës së tij. Ai është një punonjës karburanti ndaj së cilit edhe pse e pa vërtetuar, rëndonin akuza si përgjegjës i djegies së mjetit të Deizi Arapit.
Emri i Deizi Arapit nuk është një emër i panjohur për policinë, pasi një muaj me parë 27-vjeçarja nga Bilishti u prangos për prishje të qetësisë publike dhe se fyu e kundërshtoi me dhunë efektivët e policisë, ndërsa është ndjekur penalisht në gjendje të lirë motra e saj 23 vjeçe.
“Rreth orës 02:30, në qytetin e Bilishtit, ka rënë zjarr në automjetin tip “Volkswagen” në pronësi të shtetasit M. B., i cili ka qenë i parkuar përpara banesës së tij”, thuhet në njoftimin e policisë.
