Stacioni i ngritur nga firma koncesionare për kalimin me pagesë në Rrugën e Kombit është thuajse i shkatërruar. Mijëra banorë të zonës dhe sipërmarrës nga Kosova e Shqipëria, një ditë më parë i vunë flakën sporteleve ku bëhej pagesa për taksën e Rrugës së Kombit, shkruan Tirana Today.
Protestuesit u grumbulluan rreth orës 11:00 të së shtunës në protestë kundër tarifës së vendosur nga qeveria për kalimin e Rrugës së Kombit. Edhe pse fillimisht u bë thirrje për një protestë paqësore, tubimi degjeneroi në përplasje mes policisë dhe qytetarëve.
Mbi 4 furgonë të Forcave të Ndërhyrjes së shpejtë dhe dhjetëra efektive të policisë që ishin stacionuar në Kalimash nuk mundën të menaxhonin situatën e rënduar dhe irritimin e protestuesve.
Pasi u sulën ndaj kabinave të firmës koncesionare, protestruesit u vunë flakën dhe shkatërruan trarët e kalimit.
Nga përplasja me policinë raportohet për disa të lënduar mes protestuesve, por edhe efektivëve të ndërhyrjes së shpejtë.
Vetëm pas 2 orë e 30 minutash situata u qetësua. Rreth orës 14:30 protestuesit ranë dakord të ndërpresin tubimin për të diskutuar me koncesionarin dhe qeverinë kërkesën për heqjen e tarifës.
Për shkak të situatës së rëndë, qarkullimi në të dy krahët e rrugës u bllokua, duke shkaktuar radhë të gjatë automjetesh që prisnin të kalonin kufirin.
Ngjarja në fjalë u pasqyruar gjerësisht nga mediat vendase. Por, ajo ka pasur shtrirje dhe përtej kufijve gjeografikë ku shumë media ndërkombëtare kanë shkruan artikuj të tërë lidhur me këtë situatë.
Reuters: Demonstruesit në Shqipëri u ndeshën me policinë për taksën e rrugës
Deutsche Welle: Protestuesit në Shqipëri u përplasën me policinë mbi taksat e rrugës që e lidh me Kosovën
The Washington Post:Shqiptarët ndeshen me policinë, mbi tarifën e rrugës së parë me pagesë
U.S.NEWS: Demonstruesit në Shqipëri ndeshen me policinë për taksën e rrugëve
