Televizioni Publik Shqiptar nuk u ka dhënë sot sinjalin televizioneve për transmetimin e drejtpërdrejt të seancës plenare.
Një vendim i tillë ka shkaktuar reagimin e menjëhershëm të televizioneve, të cilat dënuan këtë “bojkot” të TVSH-së, madje pretendonin se Televizioni Publik Shqiptar ka kërkuar pagesë kundrejt këtij shërbimi.
Për sa i përket Rregullores së Kuvendit për çështjen në fjalë, parashikohet se TVSH transmeton në orët e shikimit më të shumtë edhe seanca të tjera plenare, për të cilat Konferenca e Kryetarëve ka vlerësuar se duhet bërë transmetimi i tyre i plotë.
Neni 108, “Transmetimi nga Televizioni Publik Shqiptar” thotë:
- Miratimi i programit politik dhe i përbërjes së Këshillit të Ministrave, seancat e pyetjeve, seanca e përjavshme e pyetje-përgjigjeve, interpelancat, interpelancat urgjente, mocionet, mocionet e besimit dhe të mosbesimit, si dhe raportet e komisioneve hetimore transmetohen të plota nga Televizioni Publik Shqiptar.
- Me kërkesën e Konferencës së Kryetarëve, Televizioni Publik Shqiptar transmeton në orët e shikimit më të shumtë edhe seanca te tjera plenare, për të cilat Konferenca e Kryetarëve ka vlerësuar, duke e përcaktuar në kalendarin e punimeve të Kuvendit, se duhet bërë transmetimi i tyre i plotë.
Ky shqetësim u ngrit në Kuvend edhe nga Partia Demokratike dhe Lëvizja Socialiste për Integrim.
Pas reagimeve të opozitës, TVSH është tërhequr nga vendimi, ndërsa ka lejuar marrjen e sinjalit edhe nga televizionet e tjera, ashtu si në çdo seancë plenare.
Lidhur me këtë ngjarje, reagoi ish-kryeministri Berisha, i cili e cilësoi këtë një akt të rëndë.
“Ndërprerja e sinjalit nga TVSH për mediat të cilat në vite kanë përcjellë ditë e natë punimet e parlamentit përben një atentat të rënde dhe akt prej xhelati të Këllcit të zi dhe Ramës të zi. Ky vendim është vepër e Edi Ramës. Jam këtu për të dënuar këtë akt të papranueshëm në një vend të lirë. Vetëm ai që ka frikë nga 2.4 mln vota dhe abstenime që ndien neverinë dhe përçmimin e qytetarëve shqiptarë mund të marrë një veprim të tillë. Iu bëj thirrje gazetarëve të bëjnë dhe ata format e protestës duke konsideruar edhe ‘blackout’ total të qeverisë. Akti i turpshëm i pashembullt, këtë mund ta imagjinojnë vetëm mendje të sëmura që iu kthehen kohërave më të zeza të Shqipërisë apo regjimeve totalitare”, deklaroi Berisha.
Ndërkohë, ish-kreu i LSI-së, Petrit Vasili tha Kuvendi është kthyer në sekt ku mohohet edhe fjala e lirë:
“Jemi në rrugën e asfiksimit e mbylljes së parlamentit, e kthimit të tij në një tempull pa gojë ku sa të jetë e mundur më shumë duhet që në sy të qytetarëve të mos hyjnë diskutimet. Ka bërë gjithçka për ta kthyer parlamentin në një sekt që nuk flet, ku fjala nuk shpërndahet. Atentati më i madh është errësimi i sinjalit, errësimi i fjalës për media shumë të rëndësishme, dritare të qytetarëve.
Për këtë qeveri jemi kthyer si në vitin ’97, ku kishim vetëm TVSH-në, atëherë kemi pasur 26 majin, patëm 25 qershorin, tani erdhi koha e një media të vetme. Kapja e tij etj etj janë komente të tepërta. Erdhi dita t’u mbyllë gojën mediave të kazanit. Fundi i fjalës së lirë në Shqipëri, opinioni publik duhet të përgatitet për një qëndrim të ri. TVSH kontrollohet nga shkollëpaku Edi Rama”, tha Vasili.
Reagon Ruçi: Rregullorja e kuvendit detyron RTSH të transmetojë disa seanca të plota që janë përcaktuar siç janë pyetjet, interpelancat, mocionet e debatit, përbërja dhe miratimi i programit. Seanca te tjera, TVSH është e detyruar që me kërkesë të konferencës së kryetarëve ti transmetojë të plota dhe në oraret i thotë Kuvendi. Kaq kemi përcaktuar deri tani. Nëse ka ndonjë mosmarrëveshje mes TVSH dhe kanaleve të tjera private këto janë çështje që zgjidhen në rrugë të tjera dhe jo në seancën e parlamentit.
