Sekretari amerikan i shtetit, Mike Pompeo ka paralajmëruar Turqinë që të mos blejë sistem raketor të mbrojtjes S-400 nga Rusia. Por me sa duket këto paralajmërime kanë rënë në vesh të shurdhët sepse Ankaraja ka anashkaluar paralajmërimin duke thënë se marrëveshja tashmë është kryer dhe nuk ka kthim.
Gjatë një takimi të NATO-s në Bruksel, Pompeo i ka thënë homologut të tij turk se Shtetet e Bashkuara janë të “shqetësuara thellë” lidhur me vendimin e Ankarasë për të blerë sistem të mbrojtjes raketore nga Rusia, të cilat nuk përkojnë me sistemet e NATO-s.
Zyrtarët amerikanë, po ashtu kanë thënë se Pompeo ka paralajmëruar Turqinë se shtetet që blejnë sisteme të tilla nga Rusia rrezikojnë të përballen me sanksione të reja, të llojit që SHBA-ja ka vënë ndaj Rusisë, duke i goditur industrinë ushtarake dhe atë të mbrojtjes.
Por, diplomati turk, Mevlut Cavusoglu, ka thënë se blerja e sistemit të mbrojtjes është nënshkruar në muajin dhjetor dhe tani “është punë e kryer”.
