Në një kohë kur shteti i Katarit gjendet prej katër ditësh i izoluar nga pesë vendet fqinje, në rrugë tokësore, detare e ajrore, Turqia sfidon duke i ardhur atij në ndihmë.
“Turqia ka shprehur mbështetjen e saj të plotë për Katarin, duke ofruar furnizime ushqimore si dhe duke ratifikuar dy marrëveshje për vendosjen e trupave në Katar dhe trajnimin e forcave të xhandarmërisë së vendit të Gjirit, informon TRT.
Eksportuesit turq kanë shprehur gatishmërinë e tyre për të furnizuar me ushqime dhe mjete të nevojshme Katarin, pasi furnizuesit e tij më të mëdhenj, përfshirë Arabinë Saudite,ndërprenë lidhjet, tha kreu i trupit tregtar kryesor të eksportit të Turqisë.
Të hënën, pesë vende arabe – Arabia Saudite, Egjipti, Emiratet e Bashkuara Arabe, Bahreini dhe Jemen – prenë lidhjet me Katarin, duke akuzuar Dohën për mbështetjen e terrorizmit.
