Pavarësisht nga shqetësimet e NATO-s, Recep Tayyip Erdogan deklaroi se Turqia ka rënë dakord që të blejë sistemin rus të raketave S-400.
Presidenti njoftoi para deputetëve se ka nënshkruar një marrëveshje me Rusinë.
“Tani kemi ndërmarrë hapa me Rusinë për këtë blerje. Marrëveshjet janë nënshkruar. Me vullnetin e Perëndisë, do të shohim ardhjen e raketave S-400 në vendin tonë dhe do të vazhdojmë pastaj me prodhimin e përbashkët,” tha Presidenti turk.
Gjithashtu, Erdogan tha se nuk i kupton shqetësimet e partnerëve të NATO-s për këtë vendim:
“Përse do të shkaktojë kjo tensione? Një vend duhet të jetë në kërkim të mënyrave ideale për sigurinë e vet,” tha ai.
Partnerët e Ankarasë në NATO kanë shprehur shqetësim rreth përputhshmërisë së sistemit raketor rus me teknologjinë e Aleancës, së bashku me frikën se Moska mund të përdorë sistemin S-400 si një “kalë troje” për të kompromentuar sistemet e NATO-s.
Kjo çështje pritet të shtojë pikëpyetjet rreth besnikërisë së Ankarasë.
Analisti në MaxWebber, Zaur Gasimov, i cili merret me marrëdhëniet ruso-turke, thotë se blerja e sistemit S-400 është një hap i kushtueshëm i palës turke për të demonstruar sovranitetin e saj dhe një sinjal për SHBA, BE dhe Gjermaninë, shkruan VOA.
“Duke blerë sistemin S-400, Ankaraja tregon se është e gatshme të afrohet më shumë me Moskën”, thotë ai.
