Lufta kundër organizatës terroriste DEASH vazhdon fuqishëm nga forcat turke të sigurisë ndërkohë që gjatë muajit gusht janë burgosur gjithsej 268 persona të dyshuar, raporton Anadolu Agency (AA).
Një nga pikat kryesore ku është përqendruar goditja e anëtarëve të DAESH është forcimi i masave të sigurisë në kufijtë e Turqisë me qëllim që të parandalohet shkuarja dhe ardhja e terroristëve në luftërat në Siri dhe Irak. Në mesin e të arrestuarve në mbarë Turqinë shumica janë shtetas të huaj, ndërsa në një seri operacionesh dhe bastisjesh policia turke ka penguar edhe disa sulme terroriste në përgatitje e sipër.
Për 48 persona është caktuar paraburgim dhe kundër tyre është ngritur procedurë gjyqësore. Në mesin e të arrestuarve janë edhe tre shtetas të Irakut të cilët para tre viteve si pjesëtarë të DEASH-it kanë marrë pjesë në masakrën dhe ekzekutimin e 1700 rekrutëve të ushtrisë irakiane në kazermën Spyker. Në një operacion antiterrorist në qendër të Stambollit është arrestuar edhe një shtetas belg me origjinë nga Algjeria, Mehdi A. dhe bashkëshortja e tij Amina Z. Një i afërm i tyre ka qenë njëri nga organizatorët e serisë së sulmeve terroriste në Paris para dy vitesh dhe hetimi kundër tij mund të zbulojë detaje të reja për sulmet e Parisit.
