Bukuria e futbollit sa vjen dhe po venitet, e kjo nga dora e atyre që duhet të vendosin drejtësi në 90’ minutat e ndeshjes, arbitrave. Gabimet e këtyre të fundit sa vjen dhe po përsëriten më shumë duke vendosur fatin e ndeshjeve. Në përballjen e Real Madridit me Juventusin, bëri bujë të madhe ajo penallti në sekondat e fundit që ndau në dy pjesë opinionin sportiv. Por në fund u vlerësua si një vendim i drejtë, pasi kontakti kishte ekzistuar. Ndërsa vetëm pak dit më pas një shfaqje tjetër turpi ndodhi në Itali, ku arbitri mban ndeshjen me dy standarde, Derbin e Italisë mes Interit dhe Juventusit, ku të favorizuar ishin bardhezinjtë.
Tashmë në bankën e të akuzuarve është edhe arbitri i ndeshjes së të martës në mbrëmje turku Cüneyt Cakir. Moviola ka dalë në përfundimin se ai nuk akordoi tre penallti në favor të bavarezëve, dhe momenti më skandaloz ishte në fundin e pjesës së parë ku Marcelo preku topin me dorë.
Gjatë pjesës së parë, kur rezultati ishte 1-1, Lewandowski u godit me gju nga Sergio Ramos sapo ishte futur në zonë. Sipas ish-gjyqtarit italian, Graziano Cesari, aktualisht specialist i moviolës, ndërhyrja e kapitenit të Realit duhej ndëshkuar me 11-metërsh.
Episodi më i diskutueshëm ishte ai i fundit të pjesës së parë, kur një krosim i Kimich u ndërpre në zonë nga Marcelo me dorën e majtë, që ishte ndjeshëm e shkëputur nga trupi. Cakir e konsideron të pavullnetshme dhe vijon lojën. Në pjesën e dytë, sërish Sergio Ramos ndërhyri ndaj Lewandowskit, por pa mundur ta prekte topin, dhe provokon rrëzimin e sulmuesit polak. Edhe në këtë rast duhej vërshëllyer për 11-metërsh, sipas Cesarit.
