Qeveria ka bërë një inventar të objekteve kulturore në të gjithë vendin që paraqesin interes për tu vizituar. Ministria e Ekonomisë dhe Turizmit ka ndërtuar një database me rreth 1391 objekte të shpërndara në 12 prefektura të vendit.
Sipas statistikave, qarqet e Vlorës dhe Gjirokastrës kanë edhe numrin më të madh të objekteve kulturore të vizitueshme, përkatësisht me nga 210 dhe 206 secila. Pas tyre vijnë qytet e Elbasanit, Tiranës, Beratit dhe Shkodrës.
Ndërkohë që qarqet e Kukësit, Dibrës dhe Lezhës kanë numrin më të ulët të objekteve.
Ministria e Kulturës publikon të dhëna ku vërehet një trend pozitiv i vizitorëve dhe të ardhurave për sa i përket turizmit kulturor.
Nga viti 2015 në vitin 2016, vizitorët në muze, parqe dhe monumente kulturore janë rritur me 17,5%, ndërkohë që të ardhurat e arkëtuara nga këto institucione janë rritur me 18,9%.
Numrin më të lartë të vizitorëve e kanë pasur Parqet Arkeologjike, ndjekur nga Monumentet e Kulturës dhe në fund Muzetë Kombëtarë.
Ndërkohë që gjatë vitit 2016 në Shqipëri kanë hyrë gjithsej 4.735.511 shtetas të huaj, ku përfshihen të gjithë vizitorët që janë regjistruar nga sistemi TIMS i Policisë së Shtetit dhe ata që kanë hyrë transit. Krahasuar me vitin 2015 numri vizitorëve të huaj ka një rritje prej 14,6%.
