Autoritetet shqiptare kanë rënë në dakordësi që të dorëzojnë trupin e Konstantinos Kacifas. Ky ishte konfirmimi i ardhur nga avokati i familjes, teksa ka dhënë një intervistë për televizionin ‘Antena’, raporton ‘Kathimerini’.
“Pritet që autoritetet në Shqipëri të lëshojnë trupin e Kacifas tek të afërmit, deri të martën”, tha avokati Efthimios Navridis, për televizionin ANT1.
Vdekja e Kacifas ka ngjallur tensione midis Greqisë dhe Shqipërisë.
“Autoritetet shqiptare pohojnë se Kacifas u vra në një shkëmbim zjarri me policinë shqiptare“, shkruan ‘Kathimerini’.
Vrasja e 35-vjeçarit nxiti protesta të tensionuara në Greqi, duke acaruar marrëdhëniet diplomatike midis dy vendeve.
Një ditë më parë, në kishën e Bularatit u mbajt një meshë për 35-vjeçarin Konstantinos Kacifas, që u vra një javë më parë nga RENEA. Nëna e 35-vjeçarit tha se ai do të mbetet hero, pasi e donte Vorio Epirin.
“Të dalë i pafajshëm fëmija im. Konstantini do të mbetet hero, dhe do të bëhem nënë e fortë. Do ta bëj zemrën gur për trimin tim. Na mbroni të drejtat tona. Djali e donte fshatin e tij dhe Vorio Epirin” , tha nëna e 35-vjeçarit.
Edhe prifti i ka bërë thirrje ambasadores greke në Tiranë që të ndërhyjë te autoritetet, për të rikthyer trupin e Kacifas në Gjirokastër, për ta varrosur.
https://tiranatoday.com/e-ema-e-kacifas-kostandini-do-te-mbetet-nje-hero/
