Presidenti amerikan, Donald Trump ndërmori sulme verbale të martën ndaj Francës dhe presidentit të saj, Emmanuel Macron, duke përmendur sondazhet që flasin për mbështetje të ulët ndaj tij dhe duke kritikuar ashpër tarifat franceze ndaj eksportit të verës amerikane si edhe faktin që Franca nuk e ka plotësuar objektivin për shpenzimet e mbrojtjes për NATO-n.
“Emmanuel Macron sugjeron ndërtimin e një ushtrie të vet për të mbrojtur Evropën nga Shtetet e Bashkuara, Kina dhe Rusia”, shkruante Presidenti Trump në Twitter.
“Por ishte Gjermania në Luftën e Parë dhe të Dytë Botërore e si funksionoi kjo për Francën? Ata filluan të mësojnë gjermanisht në Paris, para se të arrinin amerikanët. Paguaj ose mos paguaj për NATO-n!”, vazhdon ai. Zoti Trump i ka sulmuar vazhdimisht aleatët e Amerikës në NATO,pasi nuk e kanë plotësuar objektivin për të shpenzuar 2 për qind të ekonomive të tyre kombëtare për mbrojtjen, kryesisht për armë dhe forca të armatosura.
Ndërsa Presidenti Trump e ka deklaruar veten “nacionalist” të dielën në Paris, Presidenti francez Macron, ndërsa zoti Trump dëgjonte pranë tij, e denoncoi nacionalizmin në rritje në gjithë botën, duke e quajtur atë “një tradhti ndaj patriotizmit”./voa/
