34-vjeçari Arlen Hasanaj nuk e ka pranuar akuzën se ka vendosur tritolin në portën e Armand Dukës. Avokati i tij provon përmes pamjeve filmike, se ditën që ndodhi shpërthimi, 34-vjeçari ka qenë ne një qendër tregtare duke kryer blerje.
Avokati Ilia Ilia është shprehur për mediat se Hasanaj, në momentin që ka ndodhur ngjarja në Durrës ka qenë ne një qendër tregtare, dhe kjo provohet nga faturat tatimore të prera ditën e ngjarjes si dhe pamjet filmike.
“Në datën dhe orën e caktuar, ai është ndodhur në vend tjetër. Ka qenë duke realizuar një sërë blerjesh në funksion të nevojave shtëpiake. Dhe ka ardhur në shtëpi, dhe nuk ka dalë më”.
Avokati sqaron më tej se Arlen Hasanaj është futur në qendrën tregtare në orën 20:30 dhe ka dalë prej aty në orën 09:37. Vendosja e tritolit në shtëpinë e Dukës ka ndodhur në orën 22:04. Ai thotë se policia i ka marrë pamjet filmike, por vetëm ato të hyrjen në qendrën tregtare, jo të daljes dhe kjo sipas tij, mund të jetë bërë enkas. Sipas avokatit, klienti i tij është i pafajshëm dhe duhet të lirohet menjëherë, pa u nxjerrë para gjykatës.
Pamjet e kamerës së sigurisë tregonin një person që mbante një kapuç në kokë, i veshur me të zeza dhe vendoste tritol në portën e banesës së Presidentit të Federatës Shqiptare të Futbollit, Armand Duka, në Durrës.
Ndez fitilin, dhe largohet me vrap. Lënda plasëse shpërthen 1 minutë e 15 sekonda pas vendosjes. Në momentin e shpërthimit, në banesë ishin bashkëshortja dhe djali i kreut të FSHF, ndërsa ky i fundit ndodhej duke parë derbin Dinamo-Tirana në “Air Albania”. Duke folur në emisionin “Opinion” në Tv Klan, Duka kërkoi zbardhjen e ngjarjes, ndërsa publikoi edhe një mesazh kërcënues me jetë që i kishte mbërritur pak ditë më parë në celular.
