Yaya Toure që pas ardhjes së Guardiolas në Manchester nuk ka kaluar asnjë ditë të lumtur, pasi asi asnjëherë nuk është preferuar për taktikat e tij. Por kjo nuk ishte hera e parë për të, pasi edhe nga Barcelona ishte pikërisht trajneri katalan që e dëboi disa vite më parë. Tashmë Toure nuk është më pjesë e Manchester Cityt, por nuk është larguar i kënaqur nga skuadra dhe këtë e vërteton mjaft mirë në një intervistë për “France Football”.
Intervista që do të publikohet në ditën e nesërme nga ana e “France Football”, do të jetë një goditje e madhe për futbollin botëror. Kështu, gazetari sportiv, Matt Spiro nëpërmjet një postimi në “Twitter”, ka bërë publike përmbajtjen e rrëfimit të lojtarit që do të publikohet pas 24 orësh.
Toure ka rrëfyer se Guardiola është sjellë në mënyrë mizore me të, ndërsa nuk ngurron të shprehet se tekniku i Manchester Cityt nuk i pëlqen lojtarët afrikanë. Në fund lojtari 35-vjeçar e thotë qartësisht dëshirën e tij: “Dëshira ime është të shkatërroj mitin Pep”.
