Një 23- vjeçar është ndalur nga ana e policisë, në lidhje me shpërthimin me tritol në banesën e Gazmir Dacit. Policia e Tiranës informoi sot për finalizimin e operacionit “Pagesa” me arrestimin e Vilson Brahaj, 23-vjeç, lindur në Kukës dhe banues në Kamëz, Tiranë.
Njoftimi i policisë
Zbardhet në kohë rekord nga Komisariati Nr 5, ngjarja e shpërthimit të një sasie tritoli në banesën e shtetasit XH.D., në Kamëz.
Kapet dhe ndalohet autori i dyshuar i vendosjes së lëndës eksplozive. Sekuestrohet automjeti me të cilin autori ka lëvizur dhe transportuar lëndën shpërthyese.
Specialistët për Hetimin e Krimit në Komisariatin e Policisë Numër 5 Kamëz, në bashkëpunim me Specialistët e Seksionit Kundër Krimeve ndaj Jetës dhe Pronës në Drejtorinë Vendore të Policisë Tiranë, pas një punë profesionale si dhe bazuar në informacionet e grumbulluara në rrugë operative, mbrëmjen e djeshme kanë finalizuar me sukses operacionin policor të koduar “Pagesa”, ku është bërë e mundur zbardhja e ngjarjes së ndodhur më datë 27.07.2018, në rrugën “Martin Camaj” Bathore, ku në banesën e shtetasit Xh.D., është vendosur lëndë shpërthyese, duke shkaktuar vetëm dëme materiale.
Në kuadër të operacionit u bë kapja dhe ndalimi i autorit të dyshuar të kësaj ngjarje:
– Vilson Brahaj, 23-vjeç, lindur në Kukës dhe banues në Kamëz, Tiranë.
Nga tërësia e veprimeve të kryera dyshohet se ky shtetas kundrejt pagesës ka vendosur sasinë prej 500 gramë lëndë plasëse, në banesën e shtetasit XH.D.
Autori i dyshuar pas kryerjes së krimit ka hedhur në lumë tek “Ura e Tapizës” rrobat e përdorura gjatë kryerjes së krimit, ndërsa automjetin e kishte fshehur në një bodrum afër “Urës së Tapizës”.
Për arsye hetimore nuk bëjmë me dije të dhënë të tjera . Sa më sipër në cilësinë e provës materiale është sekuestruar automjeti të cilin autori i dyshuar e ka përdorur për të transportuar dhe shpërthyer lëndën plasëse në banesën e shtetasit Xh. D.
Materialet do ti kalojnë Prokurorisë së Rrethit Gjyqësor Tiranë në ngarkim të shtetasit Vilson Brahaj, për veprën penale “Shkatërrimi i pronës me eksploziv”.
Hetimi i rastit
Uniformat blu u vunë menjëherë në lëvizje pas kqyrjes së kamerave të sigurisë, ku shfaqej autori i maskuar, i cili vendoste tritolin në garazhin e banesës e largohej me vrap, dhe më pas me makinë. Ditën e shtunë janë shoqëruar tre persona, por vetëm dje, njërit prej tyre, të riut nga Kukësi, i është komunikuar ndalimi.
Policia po heton në pistën e hakmarrjes, pasi familja Daci është në konflikt me atë Kolaveri, për shkak se Gazmir Daci ka vrarë Valmir Kolaverin në 4 nëntor 2015, ndërsa ka plagosur rëndë vëllanë e tij, Robert Kolaveri.
Banesës së Xhelal Dacit, babait të Gazmirit, që po vuan dënimin me 35 vite në burg i është vendosur edhe tre herë të tjera eksploziv, ndërsa nuk është arrestuar asnjë person. Ai akuzoi Saimir Kolaverin për ngjarjen, ndërsa paralajmëroi hakmarrje nëse shteti nuk reagon.
Pamjet filmike
Në pamjet filmike shihet se si një person, i veshur me bluzë me kapuç, largohet me vrap nga banesa e Dacit, i cili vuan dënimin për vrasjen e Valmir Kolaverit dhe plagosjen e vëllait të tij, Robertit.
Shënon pikërisht ora 01: 31, kur kamera fikson momentin, ndërsa pak metra më tutje, autorin e pret një automjet, i cili largohet menjëherë nga vendi i ngjarjes. Banesa e familjes Daçi ishte e pajisur me kamera sigurie, kjo edhe për shkak të konflikteve të hershme me familjen Kolaveri. Ndërkohë, pamjet e kamerave të sigurisë u sekuestruan edhe nga policia, ndërsa shërbejnë si provë për të çuar në identifikimin e autorëve të ngjarjes.
Gazmir Daci dhe konfliktet
Banesa ku u vendos tritoli në Bathore është e Gazmir Dacit, i cili është dënuar me 35 vite burg për vrasje dhe plagosje. Ai aktualisht është duke vuajtur dënimin në burgun e Vaqarrit për vrasjen e Valmir Kolaverit në 4 nëntor 2015, ndërsa ka plagosur rëndë vëllanë e tij Robert Kolaveri, i cili mbeti i paralizuar. Për shkak të kësaj ngjarje, në 31 korrik të 2016, ndaj tij u tentua një atentat nga jashtë burgut me snajper.
Pas atentatit të dështuar në burg, policia arrestoi 24 orë pas sulmit dy autorët, Ergys Kolaveri, 25-vjeç dhe kushëriri i tij, Enea Ceka, 24-vjeç, të dy banues në Tiranë. Nga hetimet e policisë rezultoi se dy personat qëlluan me armë zjarri drejt Dacit nga një kodër drejt oborrit të burgut, por gabuan në shënjestër, pasi i plagosur mbeti një person nga Kosova.
Babai i Gazmir Dacit: E njoh atentatorin
I ati i Gazmir Dacit ka folur me emra për autorët e dyshuar të sulmit, dhe ka kërkuar nga shteti të ndërhyjë, në të kundërt do të veprojë vetë. Sipas Xhelal Dacit, autor është Saimir Kolaveri.
“Është hera e dytë që prekin në shtëpi, hera e katërt që ndodhin ngjarje. Unë me burrni i fala, kur ato pas një viti mi dolën para djalit. Kane tentuar te ma vrasin djalin edhe ne burg. Tash e mbrapa do ta kemi ndryshe, nuk të kam bo gjo, ça kam me të bo. I çoj fjalë përmes televizorit. Do më njohë Saimir Kolaveri se kush është Xhelal Daci”.
