Deputeti i Partisë Demokratike, Tritan Shehu, pas takimit me presidentin Meta me anëtarët e Komisionit të Politikës së Jashtme, të cilët kërkuan informacion për fazat e negociatave për arritjen e marrëveshjes së shumë debatuar mes Shqipërisë dhe Greqisë për çështjen e detit, tha se në këtë çështje ka probleme që lidhen me procesin dhe metodikat e grupit. Gjithashtu ai u shpreh se më e mira për të gjithë është që çështja t’i kalojë Gjykatës së Hagës.
Fjala e plotë:
“Ishte një takim mjaft i mirë me Presidentin, i cili na sqaroi për hapat e tij dhe qëndrimin e tij në lidhje me vendimin e Gjykatës Kushtetuese. Unë dhe kolegët e mi shprehen mbështetjen për zbatimin e Kushtetutës, si linja që duhet ndjekur për zbatimin e marrëveshjeve ndërkombëtare. Ne gjithashtu shprehëm shqetësimet tona. Në këtë proces mungon transparenca, nuk dihet metodika, apo edhe problematika të tjerë.Shprehëm qëndrimin tonë që zgjidhja racionale e kësaj çështje, arritja e një marrëveshje të drejtë për të gjithë palët dhe stabilitetin, evitimi i çdo keqkuptimi, çdo mungese transparence, apo elementesh të tjerë, është çuarja e kësaj çështje në dakordësi me Greqinë Gjykatën Ndërkombëtare të Dritësisë në Hagë, për të pritur verdiktin e pranueshëm për ne. Presidenti në asnjë bisedë nuk përjashton mundësinë e kalimit të kësaj çështje në Gjykatën e Hagës”, deklaroi deputeti Tritan Shehu.
