Instituti i Statistikave ka publikuar raportin “Tregtia e jashtme e mallrave” për muajin shtator 2017.
Sipas këtij raporti, rezulton se eksportet e mallrave janë rritur me 16,8% në shtator, në krahasim me të njëjtën periudhë të një viti më parë, teksa arritën vlerën 25 mld lekë.
Nga ana tjetër, edhe importet e mallrave kanë pësuar një rritje në shtator prej 10,5%, në krahasim me një vit më parë, teksa arritën vlerën 53 mld lekë.
Deficiti tregtar i këtij muaji është 29 mld lekë, duke u rritur me 5,7 %, krahasuar me shtator 2016 dhe duke u ulur me 5,9 %, në krahasim me Gusht 2017.
Por, si kanë ndryshuar eksportet dhe importet në 9 muajt e parë të vitit?
Në nëntë muajt e parë eksportet e mallrave arritën vlerën 201 mld lekë, duke u rritur me 13,3%, krahasuar me një vit më parë dhe importet e mallrave arritën vlerën 453 mld lekë, duke u rritur me 6,8%, krahasuar me një vit më parë. Deficiti tregtar arriti vlerën 252 mld lekë, duke u rritur me 2,1 %, krahasuar me 2016.
Si kanë ndikuar grupet kryesore në ndryshimin vjetor të eksporteve?
Rritja vjetore e eksporteve prej 16,8 %, këtë muaj është ndikuar kryesisht nga grupet:
“Tekstile dhe këpucë” me +5,9 pikë përqindje,
“Materiale ndërtimi dhe metale” me +5,3 pikë përqindje,
“Ushqime, pije, duhan” me +3,2 pikë përqindje.
Grupi që ka ndikuar negativisht në ndryshimin vjetor të eksporteve, është: “Minerale, lëndë djegëse, energji elektrike” me -2,0 pikë përqindje.
Eksportet, gjatë këtij nëntëmujori janë rritur me 13,3 %, krahasuar me një vit më parë. Si nëntëmujor të gjitha grupet kanë ndikuar pozitivisht në rritjen vjetore të eksporteve, ku grupet që kanë ndikuar më tepër në rritjen vjetore të eksporteve, janë: “Materiale ndërtimi dhe metale” me +5,2 pikë përqindje, “Tekstile dhe këpucë” me +4,1 pikë përqindje, “Ushqim, pije, duhan” me +1,9 pikë përqindje.
Ndikimi i grupeve kryesore në ndryshimin vjetor të importeve
Rritja vjetore e importeve prej 10,5 %, këtë muaj është ndikuar kryesisht nga grupet: “Minerale, lëndë djegëse, energji elektrike” me +6,3 pikë përqindje, “Makineri, pajisje, pjesë këmbimi” me +3,3 me pikë përqindje, “Tekstile dhe këpucë” me +1,7 pikë përqindje. Në ndryshimin vjetor të importeve ka ndikuar negativisht grupi: “Materiale ndërtimi dhe metale” me -3,9 pikë përqindje.
Si nëntëmujor, importet janë rritur me 6,8 % krahasuar me nëntëmujorin 2016. Grupet që kanë ndikuar pozitivisht në rritjen vjetore të importeve, janë: “Minerale, lëndë djegëse, energji elektrike” me +2,0 pikë përqindje,
“Tekstile dhe këpucë” me +1,3 pikë përqindje,
“Produkte kimike dhe plastike” me +1,2 pikë përqindje.
Në ndryshimin vjetor të importeve, ka ndikuar negativisht grupi: “Materiale ndërtimi dhe metale” me -0,1 pikë përqindje.
