Problemet në familjen e 56 vjeçarit Agim Myrta nga fshati Bushnesh nuk kanë të sosur. Varfëria është e ulur këmbëkryq në familjen e tij, dhe ajo që i shqetëson më shumë prindërit e tre fëmijëve është mungesa e teksteve shkollore. Djali dhe dy vajzat që shkëlqejnë në mësime, shkojnë në shkollë pa tekste, dhe për ta është mjaft e vështirë të përfitojnë njohuritë e duhura. Agimi tregon për vështirësitë që ai përjeton me fëmijët ndërsa ndihet më shumë i shqetësuar sepse nuk arrin të plotësojë dëshirat e fëmijëve për t’u blerë librat shkollorë. Borxhet e shumta për ushqimin e përditshëm, por dhe shpenzimet e tjera minimale për familjen e tij, janë sa një mal për të. Kryefamiljari nuk po mundet të kapërdijë këtë situatë.
Afro tre vite më parë e larguan nga puna, nga bindjet politike, duke i shtuar dhe më shumë problemet dhe rënduar në kushtet familjare. Profesioni i tij punëtor në mirëmbajtje, punonte në një rrugë rurale pranë fshatit. Këtij kryefamiljari i kanë mohuar të drejtën të punonte për të ushqyer fëmijët e tij. Drejtuesit vendorë e larguan Agimin nga puna sepse kishte bindje të ndryshme politike me ata.
Prej tre vitesh Agimi stërmundohet të sigurojë ndonjë të ardhur me punët të ndryshme tek fshatarët e tij, por ende nuk ka mundur të sigurojë librat shkollorë për Kristin 9 vjeç nxënës në klasën e tretë dhe dy binjaket Inva dhe Eva nga 11 vjeç në klasën e pestë. Kristi në javën e parë ka frekuentuar shkollën, por më pas ai ka refuzuar, nga mungesa e teksteve dhe paisjeve shkollorë. Dy vajzat kanë mundur të sigurojnë vetëm një pjesë të librave nga shokët e klasës, por nuk mjaftojnë. Poema e Migjenti ” kafshatë që s’kapërdihet” duket se ka gjetur dhe prekur mjaft familjen e Agimit në një fshat jo shumë larg metropolit. (Tirana Today)
