Presidenti i Zyrës së OSBE-së, Xhorxh Tsereteli u ka bërë thirrje partive politike në Shqipëri që të angazhohen në dialog dhe të ulen në një tryezë, me qëllim për të shmangur një përshkallëzim të krizës.
Ndër të tjera, Tsereteli ka deklaruar se zhvillimet e fundit politike që po ndodhin në Shqipëri, mund ta çojnë vendin në një krizë kushtetuese, ndërsa shtoi se kuadri ligjor shqiptar duhet të mbështetet dhe respektohet nga udhëheqësit politikë.
“Situata aktuale kërkon që palët politike në Shqipëri të angazhohen në dialog gjithëpërfshirës pa parakushte dhe të ulen në tryezë në mirëbesim. Dialogu duhet të synojë të shmangë një përshkallëzim të dëmshëm të krizës duke adresuar gjithashtu shqetësimet legjitime të popullit.
Ndërsa Shqipëria përgatitet të kryesojë OSBE-në në vitin 2020 dhe pret një vendim nga Këshilli Evropian për hapjen e negociatave të pranimit me BE, është e domosdoshme që të gjitha palët e interesuara të respektojnë përgjegjësitë e tyre, të cilat janë të rëndësishme për qëllimet strategjike të Shqipërisë që ndahen nga pjesa më e madhe e shoqërisë shqiptare”, tha ai.
