Një trazirë e refugjatëve dhe emigrantëve në qendrën e pritjes në Moria në ishullin lindor të Lesos në Greqi, çoi në plagosjen e 8 policëve. Sipas mediave greke, disa nga të plagosurit janë në gjendje të rëndë, por trazirat ende nuk kanë mbaruar në këto kampe.
Sipas të dhënave , trazirat dhe përplasjet shpërthyen pasi rreth 150 persona filluan të protestonin se ishin bllokuar në kamp për një kohë të pacaktuar, ndërsa hodhën akuza ndaj policëve të cilët shkuan në qendrën e pritjes. Kjo situatë ka eskaluar në dhunë dhe për pasojë janë plagosur 8 policë grekë.
Në ditët e fundit, tre refugjatë dhe emigrantë kanë kërcënuar se do të bënin vetëvrasje dhe njëri prej tyre u shtrua në spital pasi u lëndua nga elektriciteti.
Në një raport të publikuar më parë nga “Amnesty International” theksohet se mbipopullimi, kushtet e higjienës së dobët dhe siguria po i vendosin refugjatët dhe emigrantët që mbahen në kampet dhe qendrat e pritjes në rrezik serioz për jetën. TIRANA TODAY
