E ardhmja e Masimiliano Alegrit qëndron në ajër. Sezoni po mbaron në Serie A, si edhe në La Liga dhe për të gjitha klubet më të mira tashmë është koha për të planifikuar sezonin e ardhshëm, në mënyrën më të mirë të mundshme, duke filluar me trajnerët.
Në këtë aspekt, ka akoma shumë stola të pakonfirmuar në kampionatin italian që presin të qartësohet. Koha po kalon dhe Masimiliano Alegri së shpejti duhet të gjejë një destinacion të ri, që do ta rikthente në skenë pas sukseseve të arritura në stolin e Milanit dhe Juventusit.
Sigurisht që nuk ka mungesë spekulimesh për të ardhmen e trajnerit, dhe ato kanë vazhduar për muaj me radhë tanimë. Allegri është një nga kandidatët e kualifikuar për stolin e ‘Zonjës së Vjetër’, por javët e fundit ka gjithashtu këmbëngulje për hipotezën që e çon në stolin e Realit të Madridit.
Skenarët që lidhen me Alegrin përfshijnë drejtpërdrejt të ardhmen e Zinedin Zidan dhe Xhenaro Gatuzos. Kështu që Real Madrid dhe Napoli janë gjithashtu “të ngatërruar” në garën për trajnerin e ri.
Udhëkryqi është ende i padeshifrueshëm për të ardhmen e teknikut nga Livorno, që ndodhet midis pistës spanjolle dhe destinacioneve italiane.
Franco Order foli për të ardhmen e trajnerit, duke shprehur mendimet e tij për ekipin tjetër që do të mirëpriste trajnerin. Në mikrofonët e ‘TopCalcio24’, në fakt, gazetari i mirënjohur bëri një vlerësim të Alegrit, duke theksuar se ai e sheh atë më shumë si trajnerin e ardhshëm të Napolit, se sa të Real Madridit. Sigurisht një skenar intrigues për të ardhmen e afërt dhe i cili mund të jetë një pikë kthese e re për teknikun kampion të shumëfishtë të Italisë.
