72 orë kohë është afati që i kanë dhënë protestuesit kryeministrit Edi Rama për të shkarkuar dy ministrat dhe kryepolicin Gledis Nano, ku për ta, janë përgjegjësit për tragjedinë e Himarës. Një ditë më parë, për rreth dy orë, qytetarët të mbështetur nga opozita protentuan në Tiranë si reagim ndaj vrasjes së 7-vjeçares Jonada Avdia nga gomonia në Himarë.
Protesta u thirr nga aktivistë të shoqërisë civile, por asaj iu bashkuan edhe figura të opozitës nga Sali Berisha dhe simpatizantët e tij, si edhe kreu i Partisë së Lirisë, Ilir Meta, i cili u pa në krah të djalit të tij, Besartit. Me thirrjet “Jepni dorëheqjen”, “Ju jeni vrasës”, protestuesit i kanë lënë ultimatum kryeministrit Edi Rama deri të hënën që të shkarkojë ministrin e Brendshëm Bledi Çuçin, ministren e Turizmit, Mirela Kumbaro dhe Drejtorin e Përgjithshëm të Policisë së Shtetit, Gledis Nano, duke i akuzuar si përgjegjësit kryesorë për ngjarjen.
“Ultimatum, nëse deri ditën e hënë nuk shkarkon përgjegjësit e vrasjes, Çuçin, Kumbaron, Drejtorin e Policisë, do të vijojmë me protesta të pandalshme. Vrasja e Jonadës nuk mbyllet këtu, ne do të kërkojmë drejtësi deri në fund”, tha protestuesja.
Prej orës 19:00 turma lëvizi nga Ministria së Brendshme, tek Kryeministria e po ashtu edhe tek Presidenca. Njëzëri kërkuan reagimin e presidentit Bajram Begaj, i cili nuk ka shprehur as ngushëllimet e tij për vdekjen e 7-vjeçarjes Jonada Avdia, e cila u godit nga gomonia që drejtohej nga Arjan Tase.
