Sot është një ditë zie për Xhenovan, por edhe për të gjithë Italinë. Në paraditen e kësaj të shtune nisi ceremonia mortore në Xhenova për 18 nga 41 viktimat. Ndërsa për pjesën tjetër të viktimave, familjet e tyre i kanë varrosur në qytetet e tyre respektive, duke bojkotuar funeralin shtetëror në shenjë proteste ndaj papërgjegjshmërisë së qeverisë, si shkaktare të kësaj tragjedie.
Ceremonia mortore u drejtua nga Kardinali Kryepeshkopi i Xhenovas, Angelo Bagnasco. Ndërsa kanë marrë pjesë edhe presidenti i Republikës Sergio Mattarella dhe zyrtarë të tjerë të shtetit italian, shkruan Corriere della Sera.
Rreth 5 mijë janë duke shoqëruar ceremoninë mortore, ku janë vendosur 18 arkivolet, në cilët gjendet trupat e jetëve të humbura nën urën Morandi.
Familjet e viktimave të tjera kanë vendosur që të mos marrin pjesë në funeralin shtetëror dhe t’i kryejnë ritet mortore në qytetet e tyre përkatëse.
Në sallën e madhe të ceremonisë mortore, një ekip i zjarrfikësve erdhi për t’u dhënë lamtumirën e fundit viktimave. Ata kaluan para arkivoleve dhe ngushëlluan të afërmit e viktimave. Ekipet e shpëtimit morën duartrokitje të gjata në shenjë falënderimi për punën e tyre në gërmadhat e urës Morandi.
