Në një konferencë për media në Shtëpinë e Bardhë, presidenti amerikan Donald Trump, tha se shpërthimi masiv në Bejrut të Libanit mund të ketë qenë një sulm.
“Duket si një sulm i tmerrshëm”, tha Trump. Ai ka zbuluar më tej se ishte takuar me disa gjeneralë amerikanë, të cilët sipas tij, mendojnë se “incidenti ishte një sulm”.
Nga ana tjetër, zyrtarët libanezë kanë thënë se shpërthimi ka të ngjarë të ketë ndodhur për shkak të disa ton kimikateve, që ishin ruajtur në kushte të këqija, në një depo pranë portit të qytetit të Bejrutit.
Autoritetet vendase njoftojnë se deri më tani janë nxjerrë nga rrënojat 78 viktima dhe ndërkohë janë plagosur mbi 4 mijë të tjerë.
Presidenti i Libanit, Michel Aoun deklaroi se 2.750 ton nitrat amoniumi që ishin ruajtur në mënyrë të pasigurt në një depo për gjashtë vjet, shkaktuan dhe shpërthimin e fuqishëm. Kjo sasi ishte shkarkuar nga një anije në port në vitin 2013, dhe më pas ishte ruajtur në një depo. Fillimisht u raportua se ishte një shpërthim në një fabrikë fishekzjarrësh, por më pas u mësua se bëhej fjalë për një krim njerëzor.
