Gjykata e Katanias ka lënë të lirë njërin prej anëtarëve të bandës së Moisi Habilajt. Gjyqtarët vendosën të linin të lirë Fatmir Minaj, i cili ra në pranga pak javë më parë, njëherësh me pjesëtarët e tjerë të kësaj bande që trafikonte droge nga Shqipëria drejt Italisë.
Sipas Meridionews, e cila ishte ndër të parat që raportoi mbi bandën shqiptare, thekson se Fatmir Minaj, u lirua dhe Gianluca Passavanti, iu dha arrest shtëpie.
Është e njëjta gjykatë që la në burg Moisi Habilajn, që njihet si kreu i bandës shqiptare. Edhe pse gazetari i Meridionews, saktësoi se koka e trafikut të drogës shkon përtej Moisi Habilajt, duke lënë të nënkuptohet vetë ish-ministrin e Brendshëm Saimir Tahirin. Ndërsa theksoi se në përgjimet e prokurorisë italiane bëhet fjalë ekzaktësisht për ish-ministrin e Brendshëm Saimir Tahirin dhe jo për ndonjë kamionist siç pretendonte vetë Tahiri.
Kush është Fatmir Minaj
Minaj bën pjesë te 11 të akuzuarit për trafikim ndërkombëtar të lëndëve narkotike. Ai ka lindur më 15.04.1962 dhe banon në Modica të Raguzës. Ndërsa njihet si person i afërt me Habilajt, të cilët i kishin besuar atij detaje dhe informacione lidhur me ngarkesat e drogës që shkonin nga Shqipëria në drejtim të Italisë.
Sipas mediave italiane, bëhet e ditur se lirimi i Fatmir Minajt është vendosur gjatë ditës së enjte, ndërsa Moisi Habilaj do të mbetet në burg deri në përfundim të hetimeve. Minaj është mbrojtur nga avokati Biago Mauricio Catalano, i cili gjithashtu mbron në këtë çështje edhe Moisi Habilajn, kreun e kësaj bande.
Aksioni
“Trëndafili i erës” ishte aksioni, që rezultoi fatal për Habilajn dhe pjesëtarët e bandës, e cila trafikonte kanabis. Ndërsa sipas autoriteteve italiane vlera e drogës së sekuestruar arrin shifrën e 20 milionë eurove.
Bashkë me Minaj, në prangat e policisë së shtetit fqinj ranë shqiptarët Maridian Sulaj dhe kreu i bandës Moisi Habilaj, po ashtu edhe italianët Antonio Riela, Vincenzo Spampinato, Gianluca Passavanti dhe Angelo Busaça.
Disa ditë më vonë u arrestua edhe Nazer Seiti. Ndërsa është shpallur në kërkim Florjan Habilaj dhe Armando Sulaj. Ndërkaq policia italiane ka kërkuar edhe homologëve shqiptarë, për të bërë të mundur zbardhjen e gjithë rrjetit, ku midis tyre përflitet edhe ish-ministri i Brendshëm, Saimir Tahiri. 
Ndërkaq ditën e nesërme do të zbarkojë në Tiranë ministri i Brendshëm italian, Marco Minniti, i cili do të takojë Presidentin e vendit, Ilir Meta dhe homologun e tij Fatmir Xhafaj, ku trafiku i drogës midis dy vendeve do të jetë tema kryesore e bisedimeve. TIRANA TODAY
